Во категоријата на автомобили со висока проодност исто така има натпревар за тоа кој е побрз. Во овој сегмент има нов владетел, а тој се нарекува Lamborghini Urus. Новиот италијански СУВ располага со четирилитарски битурбо осумцилиндричен мотор, кој е со моќност од 650 коњски сили.
Максималниот вртежен момент е 850 Нм при 2 250 об/мин. Првпат еден автомобил Lamborghini користи и осумстепен менувач од ZF. Сето тоа му дозволува на Urus да забрзува од 0 до 100 км/ч за само 3,6 секунди, а до 200 км/ч успева да забрза за 12,8 секунди. Максималната брзина е 305 км/ч.
Доколку се земе предвид забрзувањето од 0 до 100 км/ч втор во класификацијата е Jeep Grand Cherokee Trackhawk. Неговите 717 коњски сили му дозволуваат да забрза од место до 100 км/ч за 3.7 секунди. Третата позиција ја има Mercedes-AMG GLC 63 S Coupe, кој благодарение на 510-те коњски сили успева да забрза до 100 км/ч за 3.8 секунди.
Една десетинка послаб во забрзувањето е Porsche Cayenne Turbo, кој е на 4. Позиција, додека зад него е Bentley Bentayga, кој со 600 коњски сили забрзува до 100 км/ч за 4.1 секунди. Максималната брзина на Bentley Bentayga е најблиска до шампионот Urus, 301 км/ч.
