Мултинационалниот автомобилски гигант Stellantis ќе го прекине производството во својот погон во францускиот Поаси на 15 работни дена, почнувајќи од 13 октомври.
Од компанијата објаснуваат дека целта е да се прилагоди ритамот на производство на моменталната побарувачка и да се управува поефикасно со залихите до крајот на годината. Дополнително, периодот ќе биде искористен за довршување на тековни проекти и обука на вработените.
Фабриката во Поаси, во која работат околу 2.000 лица, е задолжена за производството на малите SUV модели DS3 и Opel Mokka.
Stellantis веќе се соочува со тешка година – во првата половина од 2025 компанијата пријави нето загуба од 2,3 милијарди евра, во споредба со 5,6 милијарди евра добивка во истиот период минатата година.
Приходите паднаа за 12,6%, на 74,3 милијарди евра. Главни фактори за негативниот резултат се:
3,3 милијарди евра трошоци за гасење програми (вклучувајќи развој на водородни погони)
реструктурирање и отписи
американски царини од 300 милиони евра
неповолни курсеви и вишоци во производството
И покрај тоа, во споредба со претходните шест месеци, забележан е раст на нето приходите од 3,6%, што дава надеж за постепено стабилизирање на резултатите.
