Skoda Epiq ќе претставува првиот чекор на компанијата во конкурентниот B-сегмент на електрични кросовери — ист сегмент како Jeep Avenger, Renault 4 E-Tech и Volvo EX30 — но со уште поинтересна формула. Според првичните извештаи, новиот мал Skoda модел би можел да има почетна цена од околу 25.000 евра и особено препознатлив изглед.
Финалниот модел треба да се промовира во 2026 година. Со должина од 4,1 метар, Epiq ќе го прифати дизајнерскиот јазик „Modern Solid“ кој Skoda го промовираше со концептот претставен пред околу една година.
Дизајнот треба да биде многу сличен на концептот, со можност да се задржат и некои еколошки решенија, како што е облогата околу тркалата изработена од рециклиран материјал. На задниот дел се очекува изразен заден спојлер и осветлено лого на Skoda поставено во центарот на багажникот.
Во внатрешноста, Skoda Epiq ќе нуди технологија и лесно користење. Доколку решенијата од прототипот се потврдат, ќе добиеме мал дисплеј за инструмент таблата, надополнет со голем централен инфозабавен екран, минимизирани физички копчиња и многу корисен простор благодарение на филозофијата „Simply Clever“. Двокрак волан, веќе виден кај други концепти, го комплетира модерниот ентериер.
И покрај компактните димензии, просторот во внатрешноста е ветувачки: багажникот би можел да достигне 490 литри, што е значително повеќе од Fabia (380 литри), обезбедувајќи голема практичност.
Skoda Epiq ќе се прави врз платформата MEB Entry, истата што ќе ја користат идните Volkswagen ID.2 и Cupra Raval. Ќе биде со преден погон, а батериите ќе обезбедуваат досег од над 400 километри. Според некои гласини, ќе се нуди со батерии од 38 или 56 kWh. Се планира и двонасочна можност за полнење, што ќе овозможи напојување на надворешни уреди или враќање на енергија во мрежата.
Производството ќе се одвива во фабриката на Volkswagen во Памплона, Шпанија, а пристигнувањето во салоните се очекува во првата половина на 2026 година. Може да биде претставен на Volkswagen Night на саемот во Минхен 2025 година (закажан од 9 до 14 септември), но нема да биде прикажан пред пошироката јавност за време на настанот.
