Toyota продолжува да расте глобално, но на домашниот пазар се соочува со изненадувачки слаб резултат – во август компанијата успеала да продаде само 18 електрични возила (BEV) во цела Јапонија.
Ова отвора важно прашање за иднината на Toyota на домашниот пазар: дали компанијата ќе успее да ги убеди своите најлојални купувачи дека електричните модели се иднината, или хибридите ќе останат „златна средина“ за Јапонците и во наредната деценија?
Глобален успех, локални проблеми
Во првите осум месеци од 2025 година, Toyota заедно со своите брендови Daihatsu, Hino и Lexus продаде повеќе од 7,4 милиони возила, што претставува раст од 6,2% во споредба со минатата година. Целта од 10,8 милиони продажби на глобално ниво за 2025 изгледа достижна.
Сепак, август донесе забавување: светските продажби паднаа за 1,3% на 900.598 единици, а најголемиот удар дојде токму од Јапонија. Таму продажбите на Toyota и Lexus паднаа за 12,1%, на околу 96.000 возила. Причината, според компанијата, се проблемите во фабриките и доцнењето на испораките поради синџирот на снабдување.
Катастрофа за електричните модели
Најголемиот шок доаѓа од сегментот на електрични возила:
* Во светски рамки, продажбата на BEV порасна за 20,6%, достигнувајќи над 117.000 единици од почетокот на годината.
* Во Јапонија, пак, бројките се катастрофални – продажбата се сруши за 84,9% во август, со само 18 продадени возила.
Од јануари до август, Toyota успеала да пласира едвај 469 електрични автомобили во својата родина, што претставува пад од 71,1% во однос на истиот период минатата година.
Хибридите како јапонска формула за успех
Иронијата е што вкупната продажба на електрифицирани возила во Јапонија бележи раст од 8,8%, достигнувајќи скоро 618.000 единици. Но, овој успех е исклучиво благодарение на хибридите:
* Продадени се 603.676 хибридни автомобили,
* 13.551 плаг-ин хибрид,
* 251 возило на водородни горивни ќелии.
Јасната слика е дека јапонските купувачи сè уште веруваат повеќе во хибридната технологија на Toyota отколку во чистите електрични модели, и покрај глобалниот тренд на пораст на BEV.
