Во Македонија се возат стари автомобили. Ова може да се заклучи од просечната старост на автомобилите, но и споредбата со останатите европски земји.
Само 2.2% од вкупно регистрираните автомобили се со старост до две години, 2.7% до 5 години, 8.4% до 10 години и постари од 10 години се 86.7% од автомобилите во Македонија или околу 360.000. Сето тоа покажува дека просечната старост на воизлата во Македонија изнесува 19.1 година што ја прави Македонија земја со најстар возен парк во Европа.
Интересно е дека од 2003 па досега староста се зголемила за речиси 4 години. До 2009 година староста се намалувала, а потоа почнала да се зголемува.
Во Грција на пример, просечната старост изнесува 15.7 години, во Хрватска 12.6 години додека пак во Словенија 10.1 година. Во Германија просечната старост изнесува 9.5 години, а во Австрија 8.2 години. Најнов возен парк има во Велика Британија каде просечната старост изнесува точно 8 години.
Се чини дека најголемо влијание врз креирањето на овој неславен резултат има економската моќ како и релативната недостапност на граѓаните до финансиски поволности при купување на нов автомобил. Но свое влијание имаше и дозволата на увоз на стари половни возила со ниско ниво на ЕУРО кога годишно влегуваа над 30.000 стари возила со сомнителен квалитет, и тоа со години по ред.
