По долго очекување, Apple конечно ја пушти во употреба новата генерација на CarPlay – наречена CarPlay Ultra. Прв бренд што ќе ја имплементира е Aston Martin, а оваа нова верзија на системот го проширува Apple искуството на секој екран во автомобилот – вклучувајќи го и инструмент таблото.
Од денес, сите нови нарачки за моделите DBX, Vantage, DB12 и Vanquish ќе доаѓаат со CarPlay Ultra како стандардна опрема. Сопствениците на постоечки возила со најновиот инфозабавен систем на Aston Martin, кој првпат беше претставен со DB12 од 2024 година, ќе ја добијат новата верзија во наредните неколку недели преку дилерската мрежа.
Aston Martin вели дека тесно соработувал со Apple за да создаде систем кој ќе го задржи елегантниот дизајнерски идентитет на брендот, но истовремено ќе нуди беспрекорно Apple искуство. Корисниците ќе можат да избираат различни дизајни за брзинометарот и тахометарот, да користат мапи и медиуми преку целиот инструмент кластер и да го персонализираат екранот со теми, бои и позадини по сопствен избор.
CarPlay Ultra нуди и можност за додавање Apple виџети на било кој од екраните, а преку него се контролираат и функции како радио и клима-уред. Сепак, за клучните функции како греење, ладење, менување брзини или поставки на суспензијата, и понатаму ќе постојат физички копчиња и прекинувачи. Возачите ќе можат да управуваат со автомобилот преку екранот, преку копчиња или со помош на Siri.
Apple го најави CarPlay Ultra уште во 2022 година, а во 2024 следуваше тизер кој вети официјален старт во истата година. Иако доцнеше, сега е тука – и според многумина, вредеше да се почека.
Во моментов, CarPlay Ultra е достапен во САД и Канада, а до крајот на годината ќе биде достапен глобално. За да го користите, потребен е iPhone 12 или понов, со iOS 18.54 или понов софтвер.
Додека Aston Martin го воведува целосниот Apple систем, некои производители како General Motors и Rivian остануваат скептични и сакаат да задржат контрола над дигиталното искуство во своите возила. Наспроти нив, Ferrari практично се откажа од развој на сопствена навигација и отворено призна дека паметниот телефон е подобар избор.
Останува да се види дали CarPlay Ultra ќе се прошири низ индустријата како и оригиналниот CarPlay – но почетокот дефинитивно е ветувачки.
