Кинеските автомобили и делови во 2025 година за првпат влегле во ЕУ во поголема вредност отколку што европски автомобили и делови биле извезени во Кина. Според податоците пренесени од студија на EY, увозот од Кина достигнал 22 милијарди евра, додека европскиот извоз во Кина паднал на 16 милијарди евра.
Распоредот на силите во глобалната автомобилска индустрија се менува, а најновите бројки јасно покажуваат дека Кина се пробива сè подлабоко на европскиот пазар. Во 2025 година, увозот на кинески автомобили и делови во Европската унија за првпат ја надминал вредноста на извозот на европски автомобили и делови во Кина, според студија на EY. Податоците покажуваат дека увозот од Кина достигнал 22 милијарди евра, додека извозот од Европа кон Кина паднал на 16 милијарди евра.
Тоа значи дека европскиот трговски суфицит во автомобилскиот сектор, кој со години беше силна точка за европските производители, во меѓувреме се претворил во дефицит. Дополнително, европскиот извоз во Кина во 2025 година паднал за 34 проценти, а во споредба со 2020 година е намален за повеќе од половина. Во исто време, увозот од Кина во ЕУ пораснал за 8 проценти.
Сличен тренд се гледа и во односите меѓу Германија и Кина. Германскиот извоз на автомобили во Кина паднал од околу 30 милијарди евра во 2022 година на 13,6 милијарди евра лани, додека увозот на кинески автомобили во Германија пораснал за две третини и стигнал до 7,4 милијарди евра. Ако овој тренд продолжи, автомобилската трговија меѓу двете земји би можела да се израмни уште во текот на оваа година.
Во позадина на овие бројки стои поширока промена на европскиот пазар. Според Reuters, кинеските производители во 2025 година го удвоиле својот удел на европскиот автомобилски пазар на околу 6 проценти, со особено силно присуство во земји како Норвешка, Велика Британија, Шпанија и Италија. Една од причините е тоа што дел од нивните модели се и до 10.000 евра поевтини од споредливи европски автомобили.
Дополнителен сигнал за промената дава и структурата на европскиот пазар. ACEA објави дека регистрациите на нови автомобили во ЕУ во 2025 година пораснале за 1,8 проценти, а батериските електрични автомобили стигнале до удел од 17,4 проценти. Токму во овој период кинеските производители успеваат сè подобро да се позиционираат, особено во електричниот и хибридниот сегмент, иако ЕУ воведе дополнителни царини за кинески електрични возила.
Сепак, европските брендови и понатаму имаат силни позиции на домашен терен, особено во Германија и Франција, каде конкуренцијата е многу поостра. Кина веќе не е само голем производствен центар, туку станува и сè повлијателен извозник што директно го менува балансот во европската автомобилска индустрија. Оваа промена може да има големо влијание и врз цените, и врз понудата, и врз стратегиите на европските производители во следните години.
