Mercedes-Benz ја претстави целосно новата генерација на GLB, модел кој од класичен компактен SUV прераснува во електричен семеен херој за секој ден. Со до 7 седишта, голем багажник напред и назад, домет до 631 километар и најнова генерација дигитален кокпит со вграден AI асистент, новата GLB е замислена како „секојдневен херој со простор за спонтаност“.
Моделот стартува во две електрични верзии: GLB 250+ со 200 kW и домет до 631 км според WLTP, и врвната GLB 350 4MATIC со 260 kW и погон на сите тркала. Двете користат литиум јон батерија со искористлив капацитет од 85 kWh и 800 волтна електрична архитектура. Благодарение на тоа, на брза DC станица со до 320 kW може да се „долие“ до околу 260 километри домет за само 10 минути. AC полнењето оди до 22 kW, а GLB може да користи и 800V и 400V инфраструктура.
GLB останува верен на својата основна мисија – да биде практичен и семеен. Купувачите можат да изберат верзија со пет или седум седишта. Со надолжно подвижна втора редица, лесно се игра со просторот меѓу патниците и багажот – било да се носат деца, пријатели, кутии за селидба или големи растенија. Третиот ред е наменет за деца и помали возрасни, но токму тој ја прави GLB еден од ретките електрични модели во класата што реално нуди седум седишта.
Еден од најинтересните детали е фактот што новата електрична GLB има и „франк“ – преден багажник. Со 127 литри (104 l според ISO 3832), тоа е најголемиот преден багажник во новата моделска фамилија на Mercedes. Таму собира сандак пијалоци, неколку топки или мал шатор. Задниот багажник нуди до 540 литри кај петсед, односно 480 литри кај седумсед конфигурација, а со соборени грбови на седиштата капацитетот расте до 1.715, односно 1.605 литри.
GLB е силно ориентиран кон семејства – во втората и третата редица може да се монтираат вкупно четири детски седишта, плус уште едно на совозачкото место напред. Додадете на тоа и голем панорамски покрив како стандард, а опционално и SKY CONTROL панорамски покрив со стакло што за дел од секунда преминува од проѕирно во мат за приватност, и добивате SUV што буквално ја отвора кабината кон небото.
За патувања надвор од градот, особено важни се влечната моќ и тракцијата. Верзиите со 4MATIC имаат електромотор на предната оска кој се активира за дел од секунда кога е потребно повеќе зафат. Во пакетот е и TERRAIN MODE – посебен режим за патишта, ливади и неасфалтирани делници, како и функцијата „Transparent Bonnet“, која со помош на камерите дава виртуелен поглед „под“ автомобилот, корисно при маневрирање по нерамнини. Влечната моќ оди до 2 тони – вредност на врвот во класата кај електрични SUV, доволна за голем караван. Благодарение на носивост на куката до 100 килограми, лесно се носат и носачи со електрични велосипеди.
Комфортот и динамиката се осигурани со суспензија со адаптивни амортизери, стандардна во комбинација со 20 инчни тркала. Со прекинувачот DYNAMIC SELECT возачот бира меѓу Comfort, за меко и релаксирано возење, и Sport, со поцврсто и подиректно однесување. Дополнително, термалниот менаџмент е значително подобрен – според Mercedes, при -7 степени новата GLB ја загрева кабината двојно побрзо од претходната генерација, со приближно половина потрошена енергија.
Внатре, GLB прави голем скок напред. Новиот дизајн со минималистички форми е фокусиран околу MBUX Superscreen – голема стаклена површина зад која се кријат три дисплеи: 10,25 инчен екран за возачот, 14 инчен централен екран и уште еден 14 инчен дисплеј за совозачот. Централната конзола е „лебдечка“, поставена високо со дополнителен простор за одлагање, а новиот управувач има физички ролер за јачина и механички прекинувач за темпомат и DISTRONIC, како одговор на барањата на купувачите за поинтуитивни контроли.
За атмосфера се грижат 11 различни амбиентални стилови – со координирани бои на инструментите, графика и амбиентално светло. GLB може да се конфигурира со Progressive Line, AMG Line, AMG Line Plus, како и Night пакет и голем избор на материјали и украси, вклучително и дрво и премиум текстили.
Најголемиот технолошки скок е новиот MBUX Virtual Assistant со генеративна вештачка интелигенција. Тој овозможува природен, сложен дијалог со автомобилот, со „паметење“ на контекстот и можност да одговара на комплексни прашања, да предлага рути, да препорачува места и да ја прилагодува возачката средина според навиките и желбите на возачот. Асистентот е прикажан како „жив“ аватар и постојано е присутен на т.н. Zero Layer – почетниот екран од кој сè се контролира.
Новиот Mercedes-Benz GLB дебитира прво во електрична форма како GLB 250+ и GLB 350 4MATIC, со старт на продажбата во пролет 2026 година, а подоцна гамата ќе се прошири со дополнителни електрични верзии и хибриди. Со комбинација од реален семеен простор, долга автономија, брзо полнење, висока влечна моќ и силен дигитален пакет, GLB има задача да покаже дека електричен компактен SUV може да биде и практичен работник за секој ден, и комфорен патник за долги патувања.
