Коронавирусот смени многу работи во нашиот секојдневен живот. Смени и во начините на функционирање на многу институции, министерства, општини, јавни претпријатија како и сите останати бизниси.
Дел од овие промени ќе бидат новата реалност, долгорочна. Некои земји веќе прават анализи и стратегии, а се чини прв таков европски град е Даблин.
Главниот град на Ирска донесе среднорочни мерки во поглед на транспортот во градот. Така на сила стапи планот според кој на бројни делови од градот има воведено рестрикции за возилата како и јавниот автобуски превоз. Оваа мерка не е краткорочна односно ќе трае цела година, со голема веројатност за продолжување.
Дополнително, за да се обезбеди мобилност на граѓаните и да се поттикне алтернативниот начин, градските власти ги проширија велосипедските патеки, ги дислоцираа препреките, а веќе се прават планови и за изградба на нови велосипедски и пешачки патеки.
Градската администрација очекува употребата на возила да се намали за 30%, а јавниот автобуски превоз дури за 80%, пред се поради барањата за социјална дистанца.
