CUPRA го претстави освежениот Born со поостар дизајн, подобрен ентериер и нов Android-базиран инфозабавен систем. Во врвната верзија Born VZ, моделот нуди до 240 kW (326 КС) и домет над 600 км, а производството почнува во вториот квартал од 2026 и на пазарот пристигнува во лето 2026.
CUPRA ја засилува својата електрична понуда со новата верзија на Born – моделот што ја отвори електричната ера на брендот. Во прес-материјалите се истакнува дека Born сега добива поостар, поемотивен пристап и е „реинженеринг“ насочен кон три клучни точки: поголем домет, поизразен дизајн и подобро технолошко искуство во кабината.
Најсилниот адут е врвната изведба CUPRA Born VZ, која носи моќност до 240 kW (326 КС). CUPRA наведува и домет над 600 км (фабрички податок, зависен од финална хомологација), што е јасен сигнал дека брендот сака да оди подалеку од „спортски имиџ“ и да понуди реална секојдневна употребливост за оние што сакаат да патуваат без чести полнења.
Паралелно со VZ, гамата е поставена да покрие повеќе типови купувачи. Според објавените спецификации, Born ќе се нуди во три основни конфигурации:
* 140 kW (190 КС) со 58 kWh батерија
* 170 kW (231 КС) со 79 kWh батерија
* VZ: 240 kW (326 КС) со 79 kWh батерија
Овој распоред ја прави понудата појасна, а воедно дозволува избор меѓу „практична“ основна верзија и врвна перформансна варијанта.
Однадвор, Born добива позабележителни промени отколку што изгледа на прв поглед. CUPRA го нагласува новиот „sharknose“ пристап на предниот дел, редизајнирани браници и поагресивни линии, со цел моделот да изгледа поблиску до поновите CUPRA модели. Посебно се истакнува Matrix LED технологијата, како и освежената светлосна графика, која треба да му даде попрепознатлив „потпис“ на пат. Се споменува и осветлено CUPRA лого назад, што станува дел од визуелниот идентитет на новите генерации.
Во кабината, CUPRA прави потег што многу возачи го бараа: враќање на физички копчиња на воланот и поинтуитивни контроли. Ова е практична промена што директно влијае на секојдневното возење, затоа што го намалува „тапкањето по тач површини“ и ја подобрува контролата без одвлекување внимание. Дополнително се споменуваат нови облоги на вратите и повисок „перцепиран квалитет“, со поголем фокус на материјали што изгледаат и се чувствуваат попремиум.
Голем дел од новините се во технологијата. Born добива 12,9-инчен инфозабавен екран со нов Android-базиран оперативен систем, како и поголем 10,25-инчен Virtual Cockpit. Во понудата е и Augmented Reality Head-up Display, кој ја проектира навигацијата и клучните информации во видното поле на возачот. Насоката е јасна: Born треба да биде побрз, поинтуитивен и „помалку нервозен“ во користење, со подобра логика и побрзи реакции на системите.
CUPRA додава и функционалности што се се поважни кај електричните автомобили – Vehicle-to-Load (V2L), односно можност автомобилот да напојува надворешни уреди. Тоа го позиционира Born не само како градски EV, туку и како „life-style“ автомобил за патувања, кампување или активности каде струја од батеријата може да биде корисна.
Кај возачкото чувство, најавени се One-Pedal Drive и дополнителни поставки за динамика кај VZ, каде се очекува понагласен карактер и поостар одговор. Во исто време, CUPRA наведува дека и пакетите за асистенција се унапредени, со подобрени функции за поддршка во сообраќај и дополнителни сценарија за безбедност.
Новиот Born е дизајниран и развиен во Барселона, а ќе се произведува во Цвикау. Производството стартува во вториот квартал од 2026, а пазарното лансирање е планирано за лето 2026. Со ова CUPRA јасно го позиционира Born како клучен модел во следната фаза на брендот – електричен автомобил што сака да биде и емотивен и практичен, со доволно домет и технологија за да остане сериозен играч во сегментот.
