Јапонскиот автомобилски гигант Nissan планира да укине дополнителни 10.000 работни места ширум светот, со што вкупниот број на отпуштања би достигнал околу 20.000 – или приближно 15% од неговата вкупна работна сила. Ова го објави француската новинска агенција AFP повикувајќи се на извештај на јапонскиот NHK.
Компанијата засега не ги коментира овие најави, но тие доаѓаат само неколку месеци откако Nissan во ноември објави план за укинување на 9.000 работни места. Очекувањата за деловната 2024 година се исто така мрачни – Nissan предвидува рекорден финансиски загубен резултат меѓу 700 и 750 милијарди јени (околу 4,25 до 4,56 милијарди евра).
Автомобилскиот производител, кој и понатаму се наоѓа во процес на длабока реорганизација, се соочува со големи предизвици: зголемена конкуренција од кинеските производители и растечки притисоци поради американските царини.
Во обид да обезбеди стабилност, Nissan се обиде да се спои со Honda, но преговорите пропаднаа во февруари – откако Honda предложи Nissan да стане нејзина подружница, понуда што не беше прифатена.
Компанијата ќе ги објави официјалните финансиски резултати во вторник, но веќе сега е јасно дека следи период на големи турбуленции за еден од водечките светски производители на автомобили.
