Кога SAIC се појави во Европа преку брендот MG, брзо стана најпродаваниот кинески производител на Стариот континент – и по вкупна продажба, и по електрични автомобили. Но денес, титулата лидер во сегментот на возила без емисии ја држи BYD.
MG не планира лесно да се повлече. Напротив – компанијата најави амбициозна експанзија со која сака да се врати на врвот.
13 модели, милијарда евра инвестиција
Во наредните две години, MG ќе претстави 13 нови возила – целосно електрични, plug-in хибриди и модели со продолжен опсег (EREV). За реализација на проектот, SAIC вложува повеќе од една милијарда евра (околу 10 милијарди јуани).
„Без сегашност нема иднина,“ изјави извршниот директор Чен Куи во интервју за 21 Century. „Ако не продавате бензински автомобили – кои сè уште носат најголем дел од продажбата – не можете да одржите здрав бизнис. Но, ако не инвестирате во идни технологии, ќе бидете исфрлени од трката за електрификација.“
Паметни кокпити и батерии од нова генерација
За разлика од другите производители, MG инсистира дека неговиот влез во е-движењето не е воден од ниски цени, туку од технологија:
долгогодишно искуство во батерии,
напреден инфотејнмент,
паметни кокпити.
Во таа насока, MG веќе соработува со Oppo во областа на автономното возење. Новиот MG4 EV ќе биде првиот глобален модел со заеднички развиен систем за поврзување автомобил-до-автомобил.
Полу-цврсти батерии со досег од 1.000 km
SAIC работи и на батерии од следна генерација. Според Ли Женг, генералниот менаџер на SAIC Qingtao, новиот MG4 ќе добие полу-цврста батерија со само 5% течност. Очекувањата се автономијата да достигне 1.000 километри – бројка која би ја сместила MG4 во самиот врв на електричната понуда во светот.
