По повеќе од дваесет години успех, Volkswagen Touareg ја завршува својата импресивна кариера со последното издание – Touareg FINAL EDITION, со што официјално почнува последната година од производството на овој луксузен SUV со мотор со внатрешно согорување. Специјалната верзија ќе може да се нарача до крајот на март 2026 година, по цена која започнува од 75.025 евра.
Почетокот на легендата
Кога Volkswagen во 2002 година го претстави првиот Touareg, тоа беше смел влез во премиум сегментот — рамо до рамо со моделот Phaeton. Со моќен дизајн, врвна изработка и технолошки напредни решенија, Touareg веднаш се наметна како симбол на германскиот инженеринг. До денес се продадени повеќе од 1,2 милиони примероци во 39 земји, што го прави еден од најуспешните модели во својата класа.
Првата генерација (2002–2009): Технолошка револуција на теренот
Првиот Touareg беше вистински инженерски подвиг. Со електромеханичка стабилизација, CDC воздушно потпирање со шест нивоа и можност за преминување низ вода длабока до 58 сантиметри, SUV-от веднаш ја покажа својата офроуд моќ.
Врвот на понудата беше Touareg V10 TDI, со 5.0-литарски дизел мотор кој развиваше 313 КС и 750 Nm вртежен момент – бројки кои дури и денес звучат импресивно. Со тежина од 2,5 тони, моделот забрзуваше до 100 km/h за само 7,8 секунди и достигнуваше 225 km/h. Продадени се повеќе од 471.000 примероци, поставувајќи темели за идниот успех.
Втората генерација (2010–2018): Еволуција со хибридна технологија
Вториот Touareg ја донесе елеганцијата и хибридната револуција. Со поширока и подолга каросерија и нов преден дизајн, моделот доби уште повисоко ниво на луксуз. Во оваа генерација се појави и првиот хибриден Volkswagen – 3.0 V6 TSI Hybrid со системска моќност од 380 КС и 580 Nm, што овозможуваше забрзување до 100 km/h за само 6,5 секунди.
Со просечна потрошувачка од 8,2 L/100 km и бројни нови безбедносни системи, вториот Touareg продаде над 483.000 единици и го зацврсти имиџот на Volkswagen како премиум SUV производител.
Третата генерација (2018–2026): Врв на елеганцијата и технологијата
Третата генерација на Touareg претставуваше спој на иновации и дигитална ера. Со ново алуминиумско шасија, дигитален Innovision кокпит, и најсовремени асистентски системи, овој модел донесе комфор и динамика на едно сосема ново ниво.
Од 2020 година, врвот на понудата е Touareg R eHybrid – plug-in хибрид со 462 КС и 700 Nm вртежен момент, способен за 250 km/h и влечна моќност до 3,5 тони. Со повеќе од 265.000 продадени примероци, оваа генерација останува синоним за луксуз, стабилност и издржливост.
„Touareg FINAL EDITION“ – збогум со стил
Специјалното издание FINAL EDITION доаѓа со ексклузивни дизајнерски детали: гравирани натписи „FINAL EDITION“ на рамките од задните стакла, втиснат логотип во кожата на менувачот, и амбиентално осветлување во повеќе бои. Елеганцијата и суптилноста се споени во едно последно, колекционерско издание на SUV-иконата од Волфсбург.
По две децении, Touareg заминува со подигната глава — SUV кој покажа дека Volkswagen може да биде премиум бренд, SUV што влечеше Boeing 747, освојуваше Dakar Rally, и докажа што значи вистинска германска издржливост.
