Компаниите со помал обем на продажба, под 100.000 или 150.000 возила годишно, нема да ја преживеат претстојната конкуренција на кинескиот пазар, предвидува Ралф Брандштатер, член на УО на Volkswagen.
Германскиот автомобилски гигант Volkswagen (VW) очекува следните две години да бидат тешки на високо конкурентниот кинески автомобилски пазар.
„Во април видовме уште еден круг на намалувања на цените, така што оваа жестока конкуренција ќе продолжи во следните неколку години“, рече членот на одборот на VW, Ралф Брандштатер во Пекинг пред големиот претстоен автосалон што ќе се отвори следната недела.
Според Брандштатер, VW планира да се подготви за жестока ценовна конкуренција во следните две години и да го финансира развојот на својот бизнис со е-автомобили во Кина со продажба на возила со мотори со согорување, на кои сè уште им оди добро.
Тој додаде дека компанијата можеби ќе треба да прифати помали продажни бројки за да ги одржи цените, што веројатно ќе значи губење на уделот на пазарот на краток рок.
VW планира да се врати на исто ниво со конкурентите во Кина во однос на трошоците и технологијата почнувајќи од 2026 година за почетните компактни автомобили, рече тој. Цената на платформите за возила развиени за Кина треба да се намали за 40%, рече тој.
До 2030 година, групацијата VW, која ги вклучува и брендови како Audi и Porsche, како и VW, има за цел да продаде околу 4 милиони возила во Кина, а половина од продадените автомобили ќе бидат електрични. Според VW, тоа би одговарало на пазарен удел од 15%.
