Пазарот на нови автомобили во Европа продолжува да се намалува, при што хибридните и електричните возила заземаат сè поголем удел. Продажбата на Stellantis, Volvo и Tesla бележи пад, додека BYD, Renault, BMW и MG остваруваат значителен раст.
Според податоците на ACEA, во февруари 2025 година во ЕУ+ЕФТА+Обединетото Кралство биле регистрирани 963.540 нови автомобили, што претставува намалување од 3,1% во однос на истиот месец во 2024 година.
Овој пад е уште поизразен од јануари и е најмногу резултат на слабеењето на големите европски пазари како што се Германија (-6,4%), Италија (-6,2%), Обединетото Кралство (-1,0%) и Франција (-0,7%). Единствениот голем пазар со позитивен раст е Шпанија со +11,0%, додека земјите од ЕФТА (Исланд, Норвешка и Швајцарија) бележат благо зголемување од +0,9%.
Пазарен удел според вид на гориво
Февруари 2025 ја потврди значајната промена во структурата на пазарот – продажбата на конвенционални бензински и дизел автомобили (без хибридни варијанти) продолжува да паѓа, додека хибридите и електричните возила бележат раст.
Хибридните автомобили (мild hybrid и full hybrid) растат за 18,3%, достигнувајќи пазарен удел од 35,3%, што ги прави најпопуларната технологија во Европа. Со други зборови, повеќе од секој трет продаден автомобил е хибрид.
Електричните автомобили, пак, забележаа раст од 26,1%, достигнувајќи 17,1% пазарен удел. Продажбата на plug-in хибридите останува стабилна и сочинува 7,5% од пазарот.
Од друга страна, бензинските автомобили забележаа пад од 26,3% (28,1% пазарен удел), а дизел возилата пад од 28,3% (8,8% пазарен удел). Другите горива (LPG, метан, етанол, водород) сочинуваат само 3,1% од новите регистрации.
Победници и губитници
Една од главните причини за падот на регистрациите во февруари 2025 е значителното намалување на продажбата на Stellantis (-16,2%), вториот најголем производител во Европа. Дополнителни падови забележаа и Hyundai (-7,4%), Toyota (-5,7%), Mercedes-Benz (-5,1%), Ford (-5,8%) и Volvo (-15%).
Најголеми загуби, во релативни бројки, имаат Tesla (-40,1%), Mitsubishi (-40,2%) и Jaguar (-62%), кој се наоѓа во фаза на индустриска реорганизација.
Од друга страна, позитивни резултати бележат Renault Group (+10,8%), Volkswagen (+4,0%), BMW (+5,6%) и Saic Motor (+26,1%), матичната компанија на MG. Посебен успех има BYD, кој со раст од 210,5% во февруари 2025 ја надмина Honda според пазарен удел.
На ниво на брендови, најголем пад забележаа Fiat (-32,6%), Lancia (-72,3%), Opel/Vauxhall (-26,5%), Citroën (-15,3%) и smart (-59,0%).
Во спротивен правец, најголем раст остварија Alfa Romeo (+38,5%), Cupra (+32,3%), MINI (+29,6%), Renault (+18,8%), Alpine (+148,7%) и Lexus (+19,2%).
Заклучок
Февруари 2025 донесе продолжување на трендот на намалување на продажбата на традиционални автомобили и забрзан раст на хибридите и електричните возила. Додека некои производители како Stellantis и Tesla се соочуваат со падови, други како BYD, Renault и BMW ја зголемуваат својата пазарна позиција. Со вакви движења, европскиот автомобилски пазар сè повеќе се насочува кон електрификација.
