Конвој од 56 камиони го тестираа новиот мост Сан Џорџо изграден како замена за срушениот Моранди. Целта на последниот тест пред предавањето на мостот во сообраќај беше да се испита стабилноста на истиот.
Мостот Моранди кој е дел од А10 автопатот на 14 август 2018 година се сруши при што загинаа 43 лица. Веднаш потоа беше распишан тендер за изградба на нов мост.
Така новиот мост кој е именуван како Сан Џорџо е дело на архитектот Ренцо Пиано е со должина од 1.067 метри. Изградбата на истиот траеше 13 месеци, а на негова изградба биле вклучени околу 1.000 работници.
Интересно е што во текот на денот благодарение на сонцето и дневната светлина, мостот ќе акумулира електрична енергија додека во текот на ноќта ќе биде осветлен во боите на италијанското знаме.
