На пистата „Фиорано“ која се наоѓа во близина на централата на Ferrari во Маранело се појави прототип на возило кое во моментов се наоѓа во фаза на тестирање. Она што е интересно за него е дека не произведува никаков звук и е чисто бесшумно возило.
За овој автомобил во моментов нема конкретни информации, но според каросеријата автомобилот потсетува на Ferrari 488. Предниот и задниот дел на автомобилот се прикриени со камуфлажа, која дозволува само да се прават претпоставки што точно испробуваат Италијанците.
Од Ferrari не кријат дека засилено ги разработуваат своите автомобили кои се наоѓаат во понудата на хибридни модели, но никогаш досега немаше споменување за целосно електричен проект. Официјалните планови на компанијата се да развива хибридни модели на база на 12-цилиндричните мотори како во LaFerrari.
