Што ако првата „милионерка“ на Skoda се родеше повторно денес, во духот на модерниот дизајнерски јазик Modern Solid? Со таа идеја тимот дизајнери на Skoda Auto замисли виртуелен наследник на легендарната Skoda 100 – како елегантна, целосно современа лимузина за 21 век.
Оригиналната Skoda 100 се произведувала од 1969 до 1977 година и беше првиот модел на брендот што ја надмина границата од еден милион изработени примероци. Иако тогаш се сметала за „народен“ и достапен автомобил, поседувањето автомобил не било вообичаено, па затоа многу семејства имаат силни и емотивни спомени поврзани токму со овој модел.
Дизајнерот Мартин Пацлт објаснува дека сакал да работи со автомобил што луѓето навистина го познаваат, а многумина и лично го поседувале. Него особено го привлекле чистите, едноставни и безвременски линии на Skoda 100, кои изненадувачки добро се вклопуваат со денешната насока Modern Solid. Затоа новата визија ја задржува класичната силуета на седан, со мирни, чисти површини и големи волумени, без да паѓа во евтино ретро-копирање.
Во предниот дел, модерната Skoda 100 добива препознатлива светлосна графика со четири елементи, релјефно моделирана хауба со нагласена централна линија и светлосни ленти што се протегаат по целата ширина и напред и назад. Овие детали на современ начин се надоврзуваат на хромираните украси и отворите за вентилација кај оригиналниот модел.
Најсмелото решение е задниот дел. Пацлт бил инспириран од тоа што предното и задното стакло на старата Skoda 100 имале слична форма. Наместо класично задно стакло, концептот целосно го елиминира, па масивниот заден дел визуелно му „одговара“ на застаклениот преден дел. Така се добива скулптурален и храбар изглед што свесно ги крши правилата и поттикнува силни реакции – токму она што, според дизајнерот, треба да го прави автомобилскиот дизајн.
Отсуството на задно стакло отворило и нови технички можности. Во горниот дел на задниот крај е интегриран систем за довод на свеж воздух, надополнет со дискретни отвори на задните крила. Визијата е замислена како електричен автомобил со погон на задните тркала и технички компоненти сместени зад кабината – модерна интерпретација на оригиналната филозофија со мотор назад. Предната оска е силно поттурната нанапред, со многу краток преден надвис, а главниот багажник е поставен напред, дополнет со помал простор над задниот погонски склоп.
За Пацлт, кој повеќе од една деценија во Skoda работи како дизајнер на надворешно осветлување, овој проект бил освежувачки предизвик. Наместо да се фокусира само на светлата, тој имал можност да обликува цел автомобил по сопствена визија. Процесот започнал со класични скици со молив и креда, а кога концептот добил јасни пропорции, бил пренесен во 3D модел. Како техничка основа послужил пакетот на актуелната Superb, со цел новата Skoda 100 да биде малку поголема и поширока и визуелно да „седне“ цврсто на тркалата.
Оваа модерна Skoda 100 е дел од серијата „Icons Get a Makeover“, во која дизајнерите на брендот креативно ги препишуваат легендарните модели од историјата на Skoda. Овие визии се дизајнерски студии и не најавуваат директни сериски автомобили, но јасно покажуваат како брендот умее да ја спои својата богата традиција со дизајнерскиот јазик на иднината.
