Ferrari издаде предупредување за шест сопственици на своите ексклузивни модели 296 GTB и 296 GTS – да престанат веднаш со возење на своите автомобили, откако е откриен потенцијален проблем кој може да предизвика истекување на масло и пожар.
Оваа итна одлука е дел од нова кампања за повлекување што ги опфаќа само неколку возила од моделската година 2025, но сепак предизвика големо внимание поради престижот на брендот и цената на автомобилите, кои се движат околу 300.000 евра.
Проблемот ги зафаќа четири примероци на Ferrari 296 GTB и два примероци на 296 GTS, потврди Националната управа за безбедност на сообраќајот на патиштата (NHTSA).
Во службената пријава се наведува дека лабава навртка може да предизвика истекување на масло од турбополначот, што го зголемува ризикот од запалување.
Ferrari утврдил дека причината е погрешен момент на затегнување на навртката која го прицврстува цревото за доток на масло до турбополначот. Проблемот потекнува од полуавтоматизирана работна станица кај еден добавувач, која можеби не го применила правилниот вртежен момент при монтажа.
Производителот за првпат дознал за проблемот на почетокот на октомври, кога биле откриени слични дефекти кај два примероци на специјалната верзија „296 Speciale“ – возила кои сè уште не биле испорачани на купувачи.
По интерната истрага, Ferrari потврдил дека дефектот е ограничен само на мал број возила и дека сите други произведени примероци не се засегнати.
Досега не се пријавени ниту повреди, ниту инциденти, но од Маранело сепак решиле да издадат наредба „Do Not Drive“, со што на сопствениците им е забрането да ги управуваат автомобилите сè додека не се изврши официјална проверка.
Ferrari ќе ги контактира засегнатите клиенти во средината на декември, а овластените сервиси ќе ја проверуваат и, доколку е потребно, ќе ја затегнат навртката со точниот вртежен момент.
Иако станува збор за многу мал број возила, производителот инсистира дека безбедноста на клиентите е апсолутен приоритет.
Ова не е првпат некој суперлуксузен производител да издаде ваква наредба. Само пред неколку недели, Mercedes-Maybach издаде „не вози“ предупредување за еден сопственик поради дефект на сопирачките.
Но ваквите настани, иако ретки, покажуваат дека дури и најпрестижните марки не се имуни на производствени грешки – особено во време кога комплексноста на технологијата и автоматизацијата расте.
