Кинескиот производител Great Wall Motors се подготвува за големо враќање на европскиот пазар. Иако пред само една година ја затвори својата европска централа во Минхен и изгледаше како дефинитивно да се повлекува, компанијата сега отвора сосема ново поглавје.
На Салонот за автомобили во Гуангжу, GWM претстави повеќе од 30 нови модели распоредени меѓу шесте свои бренда – Haval, WEY, Tank, ORA, Poer и Souo – и покани делегација од европски новинари и инвеститори. Дел од овие автомобили се веќе планирани за Европа, а планот е до 2026 година на нашиот континент да пристигнат најмалку седум нови модели, со електрични и електрифицирани погонски единици.
Посебно внимание привлече новиот електричен SUV ORA 5 – долг околу 4,5 метри, со ретро линии, модерен дигитален кокпит и технологија насочена кон помлада публика. Моделот е изграден на модуларна платформа што може да прифати различни типови погон, што му дава голема флексибилност за идните верзии.
Меѓу ѕвездите на штандот беше и Tank 300 Polar Edition – теренец во лимитирана серија од 300 примероци, кои се распродадоа за само 15 минути. Моделот е ко-креиран со љубители на оф-роуд возењето, инспириран од експедиција на Антарктикот и опремен со специјална опрема за екстремни услови.
Брендот Haval го покажа моделот Menglong 2026 со хибриден систем Hi4-T, кој веќе има над 150.000 продадени примероци во Кина. WEY пак излезе на сцена со новиот WEY G9 – моноволумен што доаѓа во три верзии и ја користи наградуваната Hi4 технологија. На домашниот пазар веќе е во самиот врв по продажба во својата класа, а наскоро ќе се појави и на други азиски пазари.
Покрај новите автомобили, GWM ја претстави и својата нова генерација на системи за асистирано возење под ознаката VLA, развиена за подобро препознавање на природни команди, процена на ризици и предвидливо однесување на ADAS системите. Новиот систем CP Master првично ќе дебитира во моделите на WEY.
Иако компанијата сѐ уште не ги открива конкретните модели и рокови за Европа, јасно е дека стратегијата е амбициозна. Со присуство во 170 земји и мрежа од над 1.400 продажни и сервисни пунктови ширум светот, Great Wall Motors повторно сериозно погледнува кон стариот континент – овој пат со силен фокус на електрификација и цела палета нови SUV, теренци и семејни модели.
