Иако електричните возила се во центарот на вниманието на медиумите и политиката, Toyota – како најпродаван бренд во светот – останува верна на својата стратегија за повеќенасочен пристап кон одржливоста. Наместо целосен фокус на електрификацијата, компанијата продолжува да ги развива и хибридните технологии, а претседателот Акио Тојода објаснува зошто тоа има смисла.
„Кога станува збор за јаглеродна неутралност, ние од самиот почеток јасно кажавме дека нашиот вистински непријател е јаглерод диоксидот“, изјави Тојода за Automotive News. „Фокусот ни е на тоа што можеме веднаш да направиме за да ги намалиме емисиите. Тоа е основата на нашата стратегија и нема да се промени.“
Според него, продадените 27 милиони хибриди од Toyota имаат исто влијание врз намалувањето на емисиите како 9 милиони електрични возила. Но, Тојода предупредува дека ако тие 9 милиони EV биле произведени и користени во Јапонија – земја што се потпира на термоцентрали за производство на електрична енергија – тогаш наместо намалување, би имало зголемување на емисиите на CO₂.
Тојода нагласува дека електричните автомобили, иако немаат издувни гасови, не се „нулта емисија“ ако се земе предвид начинот на производство на електрична енергија, но и јаглеродниот отпечаток при нивно производство, особено на батериите. Дополнително, инфраструктурата за полнење сè уште е неразвиена во многу делови од светот.
Toyota моментално има само три електрични модели во Европа, меѓу кои и обновениот bZ4X, но компанијата и понатаму се потпира на хибридите – технологија што ја развива уште од 1997 година со воведувањето на Prius. Хибридни верзии денес се нудат речиси за секој модел во понудата, а побарувачката е особено силна во Европа и Северна Америка.
Но Toyota не се ограничува само на хибриди. Во нејзината визија влегуваат и plug-in хибриди, водородни возила, електрични модели и дури мотори што користат синтетички горива. Тојода објаснува: „Треба да ги разгледаме сите опции и да се движиме во сите насоки. Нашата борба не е против EV – туку против јаглеродот.“
Ова не е нов став за Тојода. Тој минатата година изјави дека и на долг рок, целосно електричните автомобили нема да сочинуваат повеќе од 30% од глобалната продажба. Според него, нагло преминување кон EV би можело да загрози милиони работни места – само во Јапонија би можеле да се изгубат околу 5,5 милиони.
Со ваков пристап, Toyota се позиционира како компанија што не трча по трендовите, туку се фокусира на реални решенија – со крајна цел вистинско и одржливо намалување на глобалното загадување.
