Шпанскиот бренд CUPRA, дел од Volkswagen групацијата, достигна голема пресвртница – од фабриката во Марторел, близу Барселона, излезе милионитиот автомобил на оваа млада марка. Јубиларниот модел е Formentor e-Hybrid, произведен во мат боја Magnetic Tech и опремен со најновата генерација plug-in хибриден погон.
Марка која е основана во 2018 година, CUPRA за само седум години успеа да произведе еден милион возила, со што го потврди својот стабилен раст и сè поголемото влијание на европскиот автомобилски пазар.
Од основањето до денес, CUPRA претстави седум модели, меѓу кои Ateca – првиот автомобил со нивниот знак, Leon, Born – првиот целосно електричен модел, како и Tavascan и Terramar, кои го следат трендот на електрификација и спортски дизајн. Следниот чекор е Raval, чија сериска продукција е закажана за 2026 година.
Јубиларниот Formentor e-Hybrid е најпродаваниот модел на брендот и најпродаваниот A-CUV во Европа. Комбинира 1.5 TSI мотор со батерија од 19,7 kWh, а системската моќност изнесува 272 КС (200 kW).
По повод јубилејот, компанијата најави внатрешна наградна игра за вработените – еден од нив ќе добие Formentor e-Hybrid на користење во траење од три години, по што возилото ќе стане дел од историската колекција на CUPRA.
Брендот активно учествува во процесот на електрификација на Volkswagen групацијата, преку проектот Future: Fast Forward, вреден 10 милијарди евра, кој има за цел целосна електрификација на производството во Шпанија.
Околу три милијарди евра се инвестирани во модернизација на фабриката во Марторел, каде што од 2026 година ќе започне производството на CUPRA Raval и Volkswagen ID. Polo, додека паралелно се финализира изградбата на фабрика за батериски системи вредна 300 милиони евра.
Покрај тоа, CUPRA го шири своето глобално присуство – по отворањето на City Garage центри во Виена и Манчестер, брендот сега располага со 12 интернационални продажно-презентациски локации, а следно е и влегувањето на пазарите на Блискиот Исток, регион кој бележи забрзан раст на интересот за електрични возила.
