Ако прогнозите се остварат, во 2026 година европските купувачи би можеле да добијат уште една мошне интересна опција: мал, евтин и штедлив plug-in хибрид кој ќе се натпреварува директно со популарните градски модели на Toyota, Renault и другите европски брендови, но со агресивна ценовна политика по која BYD веќе е препознатлив.
BYD ја подготвува следната голема офанзива на европскиот пазар, но овојпат во многу компактно пакување. Кинескиот производител развива нов мал plug-in хибрид, наменет исклучиво за Европа, кој би требало да пристигне во 2026 година и неофицијално се спомнува под името Dolphin G.
Моделот ќе се позиционира под веќе познатиот Atto 2 и ќе игра во B-сегментот, со должина од околу 4 метри и висина од околу 1,5 метри. Практично, ќе биде plug-in алтернатива на електричниот хечбек Dolphin Surf, но со фокус на купувачи кои сакаат и електричен домет и флексибилност на класичен мотор.
Новата компактна BYD ќе биде најмалиот plug-in хибрид во гамата на брендот за Европа и еден од најкомпактните PHEV модели на пазарот воопшто. Во оваа класа денес доминираат full hybrid системи, главно поради цена и простор, па BYD влегува во релативно празен сегмент со plug-in архитектура која нуди и електричен домет и ниска потрошувачка на отворен пат.
Иако точните технички податоци сè уште не се објавени, се очекува архитектурата да биде блиска до онаа на Atto 2 DM-i, малиот SUV plug-in во понудата на брендот. Тој користи 1,5 литарски бензински четирицилиндарски мотор во комбинација со електромотор напред, а системот може да работи и како сериен хибрид (бензинецот како генератор), и како паралелен (заеднички погон од моторот и електромоторот). Кај Atto 2 DM-i вкупната системска моќност е околу 212 КС, со електричен домет од околу 90 километри, па се очекува слична, но евентуално малку поскромна конфигурација кај новата компактна кола поради ограничениот простор за батерија.
Клучно е што моделот е развиен специјално за европски клиенти, а не е само адаптација на веќе постоечки кинески автомобил. Тоа е дел од новата стратегија на BYD да прави посебни модели за европскиот пазар, со димензии, дизајн и поставки прилагодени на вкусовите и навиките во ЕУ.
Производството за Европа најверојатно ќе биде сместено во новата фабрика на BYD во Унгарија, која треба да стартува со модели како Dolphin Surf и Atto 2, а потоа да се прошири и на нови компактни plug-in верзии. Така BYD не само што ќе биде поблиску до европските купувачи, туку и ќе ги избегне дополнителните давачки и царини што важат за возилата увезени директно од Кина.
Новата компактна plug-in BYD ќе стане најмал член во растечката plug-in гама на брендот во Европа, каде веќе има модели како Seal U DM-i, Seal 6 DM-i и Atto 2 DM-i. Со ова, BYD гради портфолио во кое купувачите добиваат избор од мали градски PHEV, преку семејни каравани и SUV, до поголеми модели со голем домет и моќност.
