Големите регулативи и високите трошоци во автомобилската индустрија ги тераат дури и најголемите конкуренти да соработуваат. Според најновите информации, BMW и Mercedes-Benz се во напредни преговори за ново партнерство, кое може да стартува во 2027 година.
Според шпекулациите, BMW ќе му го обезбеди на Mercedes својот добро познат 2.0 литарски турбо-бензински четирицилиндарски мотор „B48“, кој ќе се користи во идните plug-in хибридни модели. Овој мотор веќе ги исполнува строгите Euro 7 норми, а може да биде поставен и надолжно и попречно, што го прави идеално решение за широк спектар возила на Mercedes.
Од друга страна, Mercedes ќе возврати со испорака на своите автоматски менувачи „9G-Tronic“ кон BMW, со што двата производители ќе си ги обезбедат клучните компоненти без дополнителни големи инвестиции.
За BMW, ваквата соработка ќе значи одржување на работата на фабриката за мотори во Штајр, Австрија, која моментално работи под капацитет. За Mercedes, пак, тоа ќе биде излез од проблемите со новиот M252 мотор, кој се произведува во Кина преку заедничкото вложување „Horse“ (Geely, Renault и Aramco), но засега покажува ограничена флексибилност.
Ова нема да биде првпат двете компании да си подадат рака – тие веќе соработуваа во Ionity мрежата за полнење електрични возила и во проекти за автономно возење. Сепак, размена на мотори и менувачи претставува историски чекор, бидејќи се зафаќа во самото срце на автомобилската технологија.
На долг рок, BMW и Mercedes дури размислуваат за заедничка фабрика за мотори во САД, со што би се избегнале зголемените царини и дополнително би се намалиле трошоците за производство.
Иако ова партнерство изгледа неочекувано за двајца жестоки ривали, тоа е јасен сигнал колку индустријата брзо се менува и колку е неопходно споделувањето на ресурси за да се остане конкурентен во ерата на електрификацијата.
