Туристите кои во наредните години ќе ја посетат Барселона би можеле да платат и до 15 евра дополнително по ноќевање, кога ќе се соберат сите туристички такси што ги најави градот.
Градскиот совет на Барселона изгласа зголемување на контроверзната градска туристичка такса, која моментално изнесува 4 евра. Според новиот план, таа ќе се зголемува за по еден евро секоја година, сè до 2029 година кога ќе достигне вкупно 8 евра.
Оваа градска такса се плаќа покрај веќе постоечката регионална туристичка такса на Каталонија, која варира зависно од видот на сместување и времетраењето на престојот. Регионалната такса, која за хотели со пет ѕвезди може да достигне и до 7 евра, исто така се очекува да се зголеми подоцна оваа година. Тоа значи дека во некои случаи туристите би можеле да плаќаат и до 15 евра по ноќевање само во такси.
„Туристите ќе плаќаат повеќе, граѓаните – помалку“
„Колку повеќе плаќаат туристите, толку помалку ќе мора да плаќаат граѓаните“, изјави Елисенда Аламани од Републиканската левица, една од клучните поддржувачи на мерката. Таа додаде дека ова не е расправа за или против туризмот, туку начин да се редефинира пристапот и да се управува со последиците од масовниот туризам.
Пари за јавен превоз, безбедност и клима
Заменик-градоначалникот за економија и туризам, Ѓорди Валс, ја поздрави мерката, нагласувајќи дека постојниот приход од туристичките такси веќе се користи за подобрување на јавниот превоз, зголемување на безбедноста и поддршка на климатски иницијативи. Тој додаде дека фазниот пристап дава време туристичкиот сектор да се прилагоди.
Противниците предупредуваат: „Барселона станува непријателски град за туристите“
Одлуката не беше поддржана од десничарските партии Вокс и Народната партија, кои гласаа против. Тие тврдат дека со ова „се криминализира туризмот“ и предупредија дека Барселона ризикува да стане непријателски град за посетителите.
Сè зависи од одобрението на парламентот
Оваа мерка сè уште не е конечно одобрена – ќе зависи од одлуката на парламентот во октомври, кој треба да ги одобри измените на постојниот закон што го ограничува износот на ваквите такси. Само по тоа, градскиот совет ќе може да го вклучи новиот календар за зголемување во даночните прописи.
„Управувањето со туризмот веќе не е прашање на левица или десница – тоа е здрав разум. Ако не преземеме мерки, градот ќе се промени и ќе стане уште потежок за живеење“, заклучи Аламани.
