Иако Porsche официјално ја „пензионираше“ првата генерација на Macan во Европа минатата година, тоа не беше нивна желба, туку нужност – бензинскиот SUV веќе не ги исполнуваше строгите безбедносни стандарди GSR2, кои стапија во сила во јули 2024 година. Производството продолжи само за пазари надвор од Европа, но и таму му се ближи крајот – последните примероци ќе бидат склопени во 2026 година.
Сепак, љубителите на класичниот звук и мирис на бензински мотори имаат добра причина за возбуда – Porsche подготвува сосема нов SUV со мотор со внатрешно согорување, кој ќе пристигне во 2028 година. Овој модел нема да го носи името Macan, бидејќи тоа ќе остане резервирано исклучиво за електричната генерација, туку ќе добие ново, сè уште тајно име.
Главниот извршен директор на Porsche, Оливер Блуме, потврди дека новиот модел ќе биде „многу, многу типичен за Porsche“ и дека ќе се разликува од електричниот Macan BEV. За да се забрза развојот, компанијата ќе користи кратки циклуси на развој, а се шпекулира дека автомобилот ќе биде изграден врз Volkswagen Group Premium Platform Combustion (PPC) – истата архитектура што ја користи новата генерација на Audi Q5.
Тоа значи дека новиот SUV би можел да сподели технологија со најновите Q5 и SQ5, вклучително и моќни бензински и хибридни погони. Сепак, дизел нема да има – Porsche уште во 2018 година објави целосно откажување од оваа технологија.
Иако сè уште нема прототипи, Blume најавува дизајн со „карактеристичен Porsche профил“ и димензии блиски до оние на Macan. Новиот SUV ќе се позиционира во истата класа, но ќе се стреми да понуди свежа технологија, подобрени перформанси и поголема привлечност за купувачите кои сè уште не се подготвени целосно да преминат на електричен погон.
