Руската автомобилска марка Москвич ја објави првата официјална фотографија од својот нов модел со ознака 5 – урбан кросовер кој наскоро би можел да влезе во сериско производство. Од фабриката потврдија дека неколку стотици примероци од возилото веќе се подготвени.
Овие возила се дел од корпоративниот возен парк на компанијата и се наменети за последната фаза на тестирања. Искусни инженери веќе ги испитуваат возилата на терен, во различни услови и на разновидни патишта, за да ја проверат нивната издржливост и перформанси.
„Следуваат илјадници километри возење низ секакви патишта и временски услови“, соопштуваат од компанијата. Врз основа на резултатите од овие тестирања, ќе биде донесена конечната одлука за започнување со сериско производство.
Моделот Москвич 5 е резултат на тесна соработка со кинескиот производител JAC, со кого рускиот бренд има долгорочна техничка поддршка. Иако официјално партнерството не се истакнува, јасно е дека новиот модел визуелно се темели на дизајнот на JAC X6.
Со оглед на досегашниот тренд на ребрендирани модели, не е изненадување што Москвич 5 повторно го следи истиот пристап. Следните месеци ќе покажат дали овој модел ќе го добие зеленото светло за влез во понудата на домашниот и евентуално странскиот пазар.
Најверојатно, новиот Москвич 5 ќе биде опремен со 1.5-литарски бензински мотор кој ќе се нуди во две верзии – со 150 или 174 коњски сили и вртежен момент меѓу 230 и 280 њутн метри. Кросоверот се очекува да биде достапен со автоматски и рачен менувач, што ќе овозможи поголем избор за различните типови возачи.
