Geely влезе во Гинисовата книга со навидум луд подвиг – во новиот минивен Galaxy V900 успеа да се сместат дури 42 лица во кабината и да постави светски рекорд за најмногу патници во возило од овој тип. Рекордот бил официјално постигнат на 27 октомври, а јавноста првпат го виде видеото за време на саемот во Гуангжу 2025, каде V900 имаше и премиера.
Во акцијата учествувале 42 танчерки, со просечна височина од околу 170 сантиметри, кои буквално се наредија по целиот ентериер – меѓу редовите, во багажникот, околу седиштата – доволно за Гинис да го потврди новиот рекорд во категоријата MPV.
Според Geely, трикот не е само во акробатските способности на учесничките, туку во огромната внатрешна волуменска понуда: Galaxy V900 располага со искористлива внатрешна површина од 8,41 квадратни метри и исклучително ефикасно распоредени редови на седишта.
Минивенот е навистина „џин“ меѓу семејните модели – долг е повеќе од 5,3 метри, широк речиси 2 метри и има меѓуоскино растојание од 3,2 метри.
Во зависност од конфигурацијата, нуди шест луксузни седишта во три реда или осум седишта во четири реда, со последен ред што се преклопува рамно во подот. Сето тоа го прави V900 идеален за големи семејства и превоз на патници, но очигледно и совршен „реквизит“ за спектакуларни рекорди.
Во позадина на рекордот стои и модерна техника – Galaxy V900 е plug-in хибрид со 1,5-литарски турбо бензинец кој работи како генератор и батерија до 50 kWh, со електричен досег од околу 165 до над 200 километри, во зависност од верзијата. Но Geely мудро ја искористи токму пространоста, а не техничките бројки, за да привлече глобално внимание: еден минивен, 42 луѓе, еден светски рекорд и многу бесплатен маркетинг.
Иако во минатото постоеле слични забавни рекорди – како 41 човек во Toyota RAV4 или 50 во класичен Volkswagen campervan – Galaxy V900 сега официјално го држи Гинисовиот рекорд во категоријата повеќенаменски возила. А производителот веќе јасно порача: ова не е само минивен за семејства, туку минивен кој буквално го поместува поимот „колку луѓе собира“.
