И покрај неверојатната вештина и храброст на возачите, тркачките автомобили од Формула 1 и понатаму се значително побрзи од било кој мотоцикл на која било патека.
Причината е едноставна – „недостатокот“ од уште два тркала претставува пречка која досега технологијата не успеала да ја надмине. Во историјата имало многу обиди за подобрување на динамиката на возење кај моторите, но со ограничен успех. Сега, од Австралија пристигнува ново и радикално решение.
„Kejashi“ е иновативен систем за управување со мотоцикли кој овозможува предното тркало да се врти независно од рамката на моторот. На тој начин се намалува потребата за големо навалување при влез во свиок и се одржува постојан контакт и стабилно прилепување на гумите со подлогата. Дополнително, системот користи активна рака што се ротира според насоката на управувањето, создавајќи потисок во текот на целиот свиок.
Авторот на овој систем е Кент Џејмс Шилито, чија цел била да го зголеми прицврстувањето на гумите со помало навалување на мотоциклот. Првично, системот бил вграден на Honda CBR125 со преработена рамка, а подоцна и со помоќен мотор. Во практиката, концептот функционирал, иако со одредени ограничувања.
„Преместувањето на масата кон внатрешноста на свиокот – тоа е она што возачите од MotoGP се обидуваат да го направат со телото,“ објаснува Шилито за New Atlas. „Но, ако тркалото се помести кон надворешниот дел од свиокот, тогаш масата на моторот и возачот природно се преместува кон внатрешноста, што ја намалува потребата од големо навалување.“
Оваа поставеност му овозможува на системот за амортизација да работи поефикасно, а и активната рака добива поголем ефект. Кога возачот врти налево, раката се движи надесно и обратно, секогаш позиционирана така што да одржува потисок кон подлогата.
Шилито продолжува да го усовршува концептот, а идните тестирања ќе покажат дали станува збор за значаен чекор напред во технологијата на мотоциклите или за премногу комплексно решение со практични ограничувања.
