Volkswagen објави две тизер-скици од нов мал електричен SUV, кој официјално ќе биде претставен на 7 септември, во недела, пред почетокот на IAA Mobility во Минхен.
Фотографиите, кои ги сподели портпаролот на VW, Штефан Фосвинкел, на LinkedIn, откриваат компактен, но робустен дизајн со препознатливи SUV елементи: заштита на подвозјето, проширени крила, големи тркала, кровни носачи и континуирана LED светлосна лента напред.
На задниот дел, повторно доминира светлосна лента, овојпат во црвено, со осветлено VW-лого во средината. Во браникот се издвојуваат хоризонтални LED линии, што му даваат футуристички изглед.
Иако VW сè уште не го потврди името, според досегашните информации најверојатно станува збор за SUV верзијата на ID.2, која би можела да се вика ID.2 X.
Првите навестувања за овој модел ги даде шефот на брендот Томас Шефер уште во февруари, а уште во декември беше објавена силуета во која се препознаваа три хоризонтални линии на задниот столб – детали што повторно се гледаат и во новите скици.
Новите тизери откриваат компактен, практичен, но и атрактивен SUV кој ветува да стане достапна електрична алтернатива во семејството ID.
Официјалната премиера ќе се одржи идната недела во Минхен, каде Volkswagen конечно ќе го претстави моделот кој долго време беше најавуван како ID.2 X.
