Возете одговорно: Како да ги заштитиме децата во сообраќајот

ОБЈАВЕНО НА:

Поразителен е податокот во кој се наведува дека на светско ниво, речиси 500 деца секој ден го губат животот во сообраќајни незгоди. Слична е состојбата и во Република Македонија. Според податоците во 2017 година 4 деца на возраст до 14 години и 14 деца на возраст од 15 до 19 години го загубиле животот во сообраќајни незгоди.

Имајки ја во предвид црната статистика, РСБСП со апел за одговорно учество во сообраќајот особено во близина на училиште, градинка, во зони на смирен сообраќај итн. РСБСП со препораки до возачите:

* Внимавајте на децата во сообраќајот во секое време. Кога управувате со возило, сте прифатиле одговорност да внимавате на другите во сообраќајот, особено на децата. Често децата особено помалите , не се таму каде што треба да бидат или каде што вие очекувате тие да бидат. Затоа бидете внимателни во секое време и на секое место, особено во близина на училиште или градинка.

* Почитувајте го ограничувањето на брзината во населено место, особено во областите каде што има поголем сообраќај на пешаци и деца. Посебно бидете внимателни и намалете ја брзината во зона на смирен сообраќај, односно во зона каде што брзината е ограничена на 30 km/h, како што се училишните зони и улиците во соседството, каде што пешаците т.е децата може да се појават одеднаш.

* Во лоши временски услови и слабо осветлени области целокупната видливост е ограничена. Не само што е потешко за возачите да ги видат движењата на децата , исто така е тешко за децата да ги видат возилата. Затоа, бидете сигурни дека вашите светла се исправни и вклучени и правилно користите ги звучните и светлосните сигнали и бидете дополнително претпазливи.

* Кога се приближувате до пешачки премин, (во близина на училиште, градинка, во зони на смирен сообраќај итн. ) намалете ја брзината и бидете подготвени да го застанете возилото. Кога ќе застанете на пешачки премин, оставете доволно простор помеѓу вашето возило и пешачкиот премин за да може пешаците/децата безбедно да се движат и да можат другите возачи благовремено да ги видат пешаците/децата за кои вие сте застанале и сте ги пропуштиле.

* Не поминувајте ги возилата што застанале на пешачки премин. Тие застануваат да им дозволуваат на пешаците/ децата да поминат и да ги уверат дека улицата е безбедна за преминување.

* Кога ќе видите знак “училиште”, задолжително намалете ја брзината. Посветете внимание на движењето на децата во близина на патот и училиштето. Возачите секогаш треба да имаат на ум дека децата не размислуваат за опасностите на патот. Запамете дека тие не се во состојба да ја проценат брзината со која се движат возилата.

* Во близина на училиште или градинка внимателно одберете каде ќе го паркирате возилото. Паркирањето на тротоар или пешачки премин го попречува движењето на децата и ги насочува децата кон улицата и коловозот и на тој начин всушност директно ја загрозувате безбедноста на децата во сообраќајот. Исто така неправилното паркирање ги прави децата невидливи помеѓу возилата и нивното преминување на улица го прави крајно опасно.

Извор: РСБСП

Следете не и на:

24AUTO NETWORK