Русија „се отвара“ за автономните возила

ОБЈАВЕНО НА:

Русија до 2023 година ќе биде целосно подготвена да ги отвори јавните сообраќајници за автомобили без возач. За ова пишува весникот „Известија“ повикувајќи се на „патната карта“ подготвена од „Сбербанк“ и „Јандекс“ со учество на компаниите ГАЗ и КамАЗ, пренесува Russia Beyond.

Со планот за развој е предвидено проширување на можностите за тестирање на автономни возила. Конкретно, тестирањето на затворени територии ќе се врши без присуство на човек во кабината. Предложено е и да се одобри експлоатација на роботизиран превоз за комерцијални цели, т.е. за такси услуги, но со оператор на совозачкото место.

Според она што го пренесува Russia Beyond, планирано е, исто така, до крајот на годината да се подготват и усвојат препораки за процедура на истрагата на сообраќајни несреќи во кои учествуваат автоматизирани возила. Во план е и создавање на најмалку две пробни зони покриени со 5G мрежа за тестирање автомобили без возач.

Доколку се испочитува планот, веќе во 2021 година треба да биде донесен закон за експлоатација на превозни средства без возач и тогаш роботизираните возила во пробен режим веќе ќе можат да даваат комерцијални услуги. До крајот на 2022 година пробната експлоатација треба да премине во режим на стандардно функционирање.

Главниот стручњак на Научно-техничкиот центар за автономни системи на компанијата КамАЗ Дмитриј Чикрин се пожали во октомври 2019 година на тоа дека автомобилите без возач засега не можат слободно да сообраќаат по руските јавни патишта поради несовршенство или инертност на нормативната база. Според неговите зборови, засега е ризично да се пуштаат автомобилите на улица.

Според националниот проект „Дигитална економија“, планирано е во Русија до крајот на 2024 година барем тројно во однос на 2017 година да се зголемат интерните трошоци за развој на дигиталната економија за сметка на сите извори (пропорционално според уделот во бруто домашниот производ).

Следете не и на:

24AUTO NETWORK