Огромен товарен брод, кој превезувал околу 3000 возила, вклучувајќи приближно 800 електрични автомобили, потона во раните утрински часови денеска крај брегот на Алјаска. Инцидентот започнал со силен пожар што го принудил екипажот да го напушти бродот, оставајќи го да гори неконтролирано со часови пред целосно да исчезне под површината на Тихиот Океан.
Пожарот започнал пред неколку дена додека бродот пловел низ меѓународни води. И покрај обидите на екипажот да го изгасне, огнот брзо се проширил низ товарните палуби. Се претпоставува дека литиумс-јонските батерии од електричните возила придонеле за интензитетот и тешкотијата во гаснењето на пожарот, поради нивниот специфичен начин на горење.
Целиот екипаж е спасен и е во добра здравствена состојба, но товарот, проценет на на милиони долари, е изгубен. Најголема загриженост сепак предизвикуваат можните еколошки последици од потонувањето. Илјадници возила, заедно со гориво и други опасни материи на бродот, претставуваат сериозна закана за морскиот екосистем.
Експерти за морска екологија веќе изразија загриженост за можно масовно загадување со нафта, тешки метали и токсични хемикалии што можат да го нарушат животот во океанот. Властите на Алјаска и федералните агенции веќе започнаа истрага и подготвуваат план за проценка и минимизирање на еколошката штета.
Овој инцидент не е изолиран случај. Во последниве години се евидентирани неколку слични пожари на товарни бродови што превезуваат електрични возила, што отвора прашања за безбедноста при транспортот на вакви возила и потребата од построги регулативи и подобрени протоколи за спречување пожари на бродовите.
Причините за пожарот и потонувањето сè уште се истражуваат, но случајот претставува сериозно предупредување за предизвиците што ги носи брзиот технолошки напредок и потребата од ажурирање на безбедносните стандарди според новите ризици.
Сѐ уште не е објавено кои брендови или модели биле дел од товарот. Потонатиот брод „Morning Midas“, изграден во 2006 година, имал капацитет за транспорт на до 6000 возила. Тој е во сопственост на Hawthorn Navigation Inc., а управуван од компанијата Zodiac Maritime.
