Кинеските автомобили го освојуваат европскиот пазар – првпат попривлечни од американските
Драматичен пресврт на европскиот автомобилски пазар: за прв пат повеќе купувачи би размислиле да купат кинески автомобил отколку американски. Истражување на компанијата Escalent, спроведено во пет водечки пазари (Велика Британија, Германија, Франција, Шпанија и Италија), открива дека 47% од анкетираните би купиле автомобил од кинески производител, додека американските автомобили добиле поддршка од 44%.
Овој резултат е изненадувачки со оглед на тоа што минатата година ситуацијата била обратна – 51% од европските купувачи преферирале американски брендови, а само 31% кинески.
Покрај тоа, довербата во кинеските марки расте: сега 19% од испитаниците веруваат во нивниот квалитет (во однос на 12% минатата година). За споредба, довербата во американската автоиндустрија паднала од 31% на 24%.
Според KC Boyce, потпретседател во Escalent, геополитичките односи, царините и ставот на САД кон Русија и Украина би можеле да играат улога во промената на перцепцијата кај европските потрошувачи.
Сепак, цената останува главен фактор за купувачите. Дури 72% сметаат дека кинеските автомобили мора да бидат поевтини за да бидат атрактивни, а само 13% се подготвени да платат повеќе дури и ако квалитетот е подобар.
Оваа промена на ставовите доаѓа во момент кога кинеските производители како BYD, SAIC и MG агресивно се шират на европскиот пазар, нудејќи електрични и хибридни модели по значително пониски цени од конкуренцијата. Со оглед на растечката популарност на електричните возила и растечките цени на енергија и одржување, Европа може да стане клучно бојно поле меѓу кинеските и американските авто-брендови.
